स्पेनमा केही समय यता आकासिएको बिजुलीको मूल्यले अगस्ट महिनामा अहिले सम्मकै सबैभन्दा महँगो रेकर्ड् छोएको छ । बिजुलीको मूल्य अगस्टमा स्पेनको इतिहासकै सबैभन्दा महँगो १ सय ३० यूरो ५३ सेन्ट प्रति मेघावाट आवर पुगेको छ । बिजुलीको यो मूल्य ग्रिस पछि युरोपमा दोस्रो सबैभन्दा महँगो हो । गत बर्षको तुलनामा करिब २००% ले बढेको बिजुलीको मूल्य अघिल्लो महिना जुलाइको तुलनामा १४% ले बढेको छ भने पछिल्लो २४ घण्टामा ६ यूरोले बढेको छ । स्पेनको बिजुलीको मुख्य श्रोत प्राकृतिक ग्यास र पेट्रोलियम पदार्थको अन्तराष्ट्रिय मुल्य आकासिदा यहाँको उर्जा बजारमा असर परेको हो । बिजुलीको मूल्यमा भएको वृद्धिले ११ मिलियन घरेलु उपभोक्तालाई असर गर्ने छ । उर्जाको मूल्यमा भएको वृद्धिले अन्य उपभोग्य बस्तुको बजार भाउ समेत बढ्ने छ । स्पेनमा २२% उर्जा न्यु क्लियर इनर्जीबाट, ४०% प्राकृतिक ग्यास र पेट्रोलियमबाट तथा बाँकी नवीकरणीय उर्जा र आयातबाट पूर्ति गरिन्छ ।